Këshilli i Qarkut Durrës, në kuadër të projektit HEATSAFE, të mbështetur nga programi Interreg Euro-MED dhe të bashkëfinancuar nga Bashkimi Evropian, ka nisur një fushatë informuese dhe ndërgjegjësuese për parandalimin e rreziqeve që lidhen me temperaturat e larta.

Kjo nismë synon të rrisë ndërgjegjësimin e qytetarëve dhe të mbrojë shëndetin e tyre gjatë ditëve të nxehta të verës, veçanërisht gjatë periudhave me temperatura ekstreme.

Në funksion të sigurisë dhe mirëqenies së komunitetit, në Durrës po përgatiten masa konkrete lokale për përshtatjen ndaj valëve të të nxehtit. Vëmendje e veçantë do t’u kushtohet grupeve më të rrezikuara, përfshirë të moshuarit, fëmijët, personat me sëmundje kronike, personat me aftësi të kufizuara dhe qytetarët e ekspozuar për periudha të gjata ndaj temperaturave të larta.

Qëllimi është që si banorët e qarkut, ashtu edhe vizitorët e shumtë që zgjedhin Durrësin gjatë sezonit veror, të jenë sa më të informuar, të përgatitur dhe të mbrojtur gjatë ditëve me të nxehtë ekstrem.

Ju ftojmë të ndiqni në vazhdimësi kanalet tona zyrtare për t’u njohur me këshilla praktike, masa parandaluese dhe rekomandime të dobishme për mbrojtjen nga temperaturat e larta.

Le të kujdesemi për veten dhe për njëri-tjetrin, për të kaluar së bashku një verë të sigurt dhe të shëndetshme.